14.05.2012 17:35
Þá er komið að því !!! Allar hressar kvennasveitarkonur nú er að drífa í að skrá sig hjá formanni í síma 8402512 og flykkjast í óvæntann leiðangur um hóla og hæðir, sali eða kima, sjó eða sveitir. eða hvað annað sem skipuleggjendum dettur í hug.
Dagsetningin er 17 Maí og farið af stað kl 17:00 og nánari upplýsingar að sjálfsögðu ekki fáanlegar nema þú skráir þig hjá formanni eða á fb :)
jo jo og allar að mæta
09.05.2012 08:44
Eitt af því sem stjórn SL hefur gert til að gera félaga sína sýnilegri er að hvetja félagsmenn sína til að klæðast peysunum sínum 11 Maí, að það sé svona "peysudagur" Slysavarnafélagsins Landsbjargar. Þá eru allir félagar hvort sem þeir eru í Kvennasveitum, Slysavarnadeildum, Björgunarsveitum eða Unglingadeildum hvattir til að vera í peysunum sínum og þannig mála "bæinn rauðann" með því að sýna samborgurum okkar hvað við erum mörg og hvað við erum víða í samfélaginu. Svo nú ætlum við að taka höndum saman allar sem ein og klæðast peysunum okkar stoltar og hreyknar af því að vera hluti af þessu félagi :)
03.05.2012 14:17
Nú liggur við að konur í Kvennasveitinni leggi fram krafta sína og þjónustulund við að vinna að og undirbúa mat fyrir þá sem taka þátt í Landsæfingunni sem er Laugardaginn. Það á að búa til kjötsúpu og vantar konur til að vinna að því í dag Fimmtudag og Föstudag og sjá um það, ásamt því að undirbúa morgunmat á laugardeginum, sjá um að gefa pizzur í hádeginu og bjóða svo kjötsúpu seinni partinn þegar æfingu er að ljúka. Áætlað er að um 150 manns taki þátt í þessari æfingu. Stjórn vill minna á að venju þá vinna margar hendur létt verk, en ef þið styðjið ekki við þetta þá lendir þetta á alltof fáum höndum. Sýnum nú stuðning okkar í verki við félagið okkar og hringið í Berglindi og skráið ykkur. Síminn er 8659703
Næst á dagskrá hjá okkur er svo óvissuferð Fimmtudaginn 17 Maí og mun Björgunarsveitin Suðurnes sjá um skipulag og undirbúning :) Nánari upplýsingar síðar.
Svo er er bara að nálgast okkar stærsta fjáröflunarverkefni sem er sala á Sjómannadagsmerkinu. Að venju er hún fyrstu helgina í Júní og biðjum við konur að undirbúa sig fyrir það og taka vel í að skrá sig til þáttöku þegar nær dregur.
27.04.2012 22:03
Merki Rafiðnaðarsambands Íslands.
Kæru félagskonur.
Rafiðnaðarsamband Íslands var með þing í Reykjanesbæ s.l. tvo daga og að venju þá gefa þeir styrki á seinni degi þingsins til félagasamtaka sem sinna hinum ýmsu samfélagsmálum og einnig velja þeir alltaf félag af því svæði sem þingið er á. Við höfðum sent þeim styrkbeiðni og vorum vongóðar um árangur þar sem við erum að vinna að mörgum góðum málum sem verðskulda viðurkenningu. Um hádegi er hringt í formanninn og hún boðuð á fund þingsins kl 14:40. Það varð nú dálítið stress í gangi hjá formaninum og fékk hún ritarann til að koma með sér til að hitta þessu góðu samkomu og mættu þær stundvíslega klæddar í sínum rauðu peysum. Til að gera góða sögu stutta þá fór um þær báðar og hakan féll niður á bringu þegar tilkynt var að Rafiðnaðarsamband Íslands hefði ákveðið að styrkja Kvennasveitina Dagbjörgu um
600.000kr.
Í tilefni þess að þetta þing var haldið í Reykjanesbæ ákvað Rafiðnaðarfélag Suðurnesja einnig að gefa styrk til samfélagsverkefna og veittu Kvennasveitinni Dagbjörgu 250.000kr styrk til að halda áfram sínu öfluga starfi.
Stjórn Kvennasveitarinnar er mjög þakklát og einnig stolt af þessum styrkjum sem okkur er veittur til að halda áfram okkar öfluga starfi sem er í þágu bæjarbúa Reykjanesbæjar og stuðlar að slysavörnum á heimilum og í okkar nánasta umhverfi svo ekki sé minnst á stuðning okkar við Björgunarsveitina Suðurnes. Með þessu eru þessi félög einnig að veita þeim einstaklingum sem gefa af sér bæði tíma og orku mikla viðurkenningu.
17.04.2012 14:00
Á afmælisfundinum í gær tilkynntu Anna Ragna, Svana og Hanna Ingumundard. að gönguhópurinn okkar væri byrjaður aftur eftir smá hlé :)
Við ætlum að hittast á Mánudögum og Miðvikudögum kl 18:00 og verður Sundmiðstöðin útgangspunkturinn. Við munum svo ákveða hvort við löbbum á Vetrarbrautinni eða eitthvað annað allt eftir því hvaða hugmyndir við höfum í kollinum eða eftir því hvað geta og löngun okkar segir til um í það og það skriftið.
Allar samtaka nú og mæta á Miðvikudaginn 18 Apríl kl. 18:00 og vera með :)
09.04.2012 19:53
Kæru félagsmenn nú er sveitin okkar að verða 8 ára og í tilefni þess ætlum við að hittast og gera okkur glaðan dag.
Mánudaginn 16 Apríl n.k verður súpufundur í veitingasal Kaffitárs Stapabraut 7. kl 19:00. í boði verður girnileg kjúklingasúpa og nýbakað brauð. Einnig verður boðið uppá kaffi og ljúffenga súkkulaðiköku.
Kostnaður á mann er 1500kr. og skráning á fundinn er hjá Kristbjörgu í síma 8402512 eða á fb í hópnum félagskonur.
Stjórn vonast til að sjá sem flesta félagsmenn þar sem starfsárið er að verða búið og við höfum lokið við flest af stóru verkefnum sveitarinnar og alltaf er gaman að gleðjast og verðlauna sjálfan sig fyrir vel unnin störf.
03.04.2012 12:30
Eða ekki :) Alla vega verður þemað fjólublátt á árshátíð Kvennasveitarinnar Dagbjargar og Björgunarsveitarinnar Suðurnes sem verður haldin Laugardaginn 28 Apríl.
Mæting er kl 19:00 og matur hefst kl 19:30. og kostar 3500kr fyrir manninn.
Þetta er upp á Ásbrú á stað sem heitir Community Center.
Að venju er boðið uppá hugmyndarík og fjörug skemmtiatriði eftir matinn, hið hefðbundna happadrætti er á sínum stað og hafa vinningar aldrei verið veglegri né skemmtilegri og að lokum fáum við hæfileikaríka fjörkálfa til að spila fjölbreytta tónlist fyrir okkur svo við getum látið dansinn duna sem aldrei fyrr langt fram á nótt.
Skráning hafin hjá Hönnu Birnu í síma 691-9029 og er hægt að skrá sig til 18 Apríl. Í fyrra mættu aðeins 7 konur frá Kvennasveitinni. Nú skulum við gera enn betur og mæta í stórum hóp og sýna nýjum og gömlum félögum hvað gaman það er að koma saman og skemmta sér í góðra vina hóp.
26.03.2012 21:20
Þar sem páskar nálgast og flestir vilja eyða tímanum með fjölskyldunni sinni þessa frídaga verður enginn félagsfundur fyrsta Mánudag í Apríl. Í staðinn ætlum við að hafa afmælisfund 16 Apríl. Verður það súpufundur eins og við höfum haldið nokkrum sinnum áður í tilefni afmælisins og stefnt er á að hafa hann í Kaffitár.
Nánari upplýsingar síðar.
23.03.2012 13:19
Í dag eru einungis 6 mánuðir í að hið fjölbreytta, uppbyggjandi og skemmtilega Kvennaþing SL verður haldið að Ásbrú áður fyrr "Völlurinn" í Reykjanssbæ daganna 21 - 23 September þar sem þemað er að sjálfsögðu "hernámsárin" með öllu sínu ástandi, dátum og draumum :)
Skipulag gengur vel, drög að dagskrá þingsins er að verða komið og sama má segja um kostnað fyrir þingið. Þannig að allar upplýsingar ættu að liggja fyrir fljótlega.
Fyrir ykkur sem ætlið að mæta er um að gera að panta sem fyrst gistingu hjá Gistihúsi Keflavíkur Valhallarbraut 761 Ásbrú. Síminn er 4265000 og netfangið gistihus@internet.is. í boði eru 2. 4. og 6 manna herbergi. Á þessu hóteli er svefnpláss fyrir 200 manns svo við ættum allar að rúmast þar fyrir, en ef þið viljið frekar vera niðrí Keflavík þá er hægt að panta hjá Flughótel-Icelandair Hotels Hafnargötu 57 flughotel@icehotels.is, Hótel Keilir Hafnargötu 37 info@hotelkeilir.is og Hótel Keflavík Vatnsnesvegi 12 - 14 stay@kef.is
Allar upplýsingar munu birtast á heimasíðunni okkar, kvennasveitindagbjorg.123.is, en einnig eru sömu upplýsingar á fésbókarsíðunni okkar. Síðan verður stofnaður "viðburður" á fésbókarsíðunni þar sem við getum sett inn allskonar nánari fréttir og upplýsingar, og þar sem þið getið komið með ykkar fyrirspurnir og vangaveltur um hvað, hvernig og hvar.
Koma svo allar kraftmiklar slysavarnakonur Íslands ! takið þessa daga frá, pantið ykkur helgardvöl á Suðurnesjum, komist í snertingu við ómengaða kvennakrafta, komið saman til að búa til það afl sem styður við varnir og virkjum okkur sjálfar til að styrkja okkur og efla.
20.03.2012 18:08
Allar konur í Kvennasveitinni Dagbjörgu hefðu átt að fá boða í morgun um fund hjá undirbúningshóp Miðvikudaginn 21 Mars kl. 17:00 í húsi Björgunarsveitarinnar. Ef boðinn kom ekki til ykkar endilega látið ritara ( Sollu síma 6632250 ) vita svo hún geti lagfært það því það er ansi fúlt að missa af fundi útaf boðskiftaveseni sem þarf ekki að vera :)
Svo nú er bara að koma á fund hjá undirbúningshópnum, margt sem þarf að ræða og taka ákvörðun um, koma með sínar hugmyndir, setja mark sitt á þennann merkilega atburð og vera með í hópnum sem á eftir að lifa í sögunni sem "þær sem skipulögðu hið velheppnaða Kvennaþing á Suðurnesjum"
17.03.2012 16:15
Á aðalfundi 16 Mars var kosin ný stjórn fyrir Kvennasveitina Dagbjörgu. Nokkrar breytingar urðu þar sem Berglind Karlsdóttir, Sigurlaug Erla Pétursdóttir og Sigurlaug Guðmundsdóttir gáfu ekki kost á sér og er skipan stjórnar nú eftirfarandi.
Formaður Kristbjörg Gunnbjörnsdóttir
Varaformaður Anna Ragna Siggeirsdóttir
Gjaldkeri Ásta Gunnarsdóttir
Ritari Sólbjörg Gunnbjörnsdóttir
Meðstjórnandi Hanna Ingimundardóttir
Varamenn Svanhvít Elínardóttir og Hanna Vilhjálmsdóttir.
10 konur voru í morgun að heimsækja eldri borgara í Reykjanesbæ sem verða 78 á árinu, ræða við þau um slysavarnir og örugg efri ár og færa þeim bæklinga frá Slysavarnafélaginu Landsbjörgu og gjöf frá Securitas. þetta gekk mjög vel og var vel tekið á móti þeim, svo vel á sumum stöðum að konur stóðu á blístri eftir velgjörðir sem þeim var veitt og boðið í :)
Næst á dagskrá er svo
undirbúningsfundur en nánari dagsetning kemur fljótlega en áætlað er að hafa hann í vikunni framundan og svo er það
Landshlutafundurinn næsta Laugardag 24 Mars í Hafnarfirði. 7 konur hafa skráð sig en ef fleiri vilja koma með endilega að drífa sig að hafa samband við Kristbjörgu í síma 8402512.
08.03.2012 14:11
Nú er Aðalfundur Kvennasveitarinnar að nálgast og eiga allar konur að vera búnar að fá boð um hann, ef það hefur ekki borist til ykkar endilega látið Erlu vita og hún reddar því á nóinu :)
Aðalfundurinn verður haldinn í húsi BS Holtsgötu 51. Föstudaginn 16 Mars kl. 20:00 og er dagskrá hans hefðbundin og eftirfarandi:
Formaður setur fund og skipar fundarstjóra og fundarritara
Skýrsla stjórnar og umræður.
Reikningar skýrðir og lagðir fram til samþykktar.
Lagabreytingar.
Kosning stjórnar, varastjórnar og skoðunarmanna.
Ákvörðun árgjalds.
Önnur mál.
Nokkrir félagsmenn hafa boðist til að sjá um veitingar eftir fund til að gleðja okkur og seðja :)
Síðan er bara að vakna hressar daginn eftir Aðalfund og skella sér aftur niðrí hús fyrir kl. 10.00 því þá ætlum við að hittast, borða morgunmat og undirbúa okkur undir það að fara að heimsækja þá bæjarbúa Reykjanesbæjar sem verða 78 á árinu til að fá að ræða við þá um öryggi á heimilum og nánasta umhverfi. Búið verður að senda þeim bréf um komu okkar og einnig á að fá birta fréttatilkynningu um þetta í VF.
Þetta er eitt af stóru slysavarnaverkefnum okkar og hvetjum við alla félaga til að koma og taka þátt í þessu merkilega starfi.
02.03.2012 14:29
Að venju er félagsfundur fyrsta Mánudag í mánuði svo næsti fundur er að skella á :)
Mánudagskvöldið 5 Mars er félagsfundur hjá okkur í húsi BS Holtsgötu 51. kl. 20:00. Á dagskrá er starfsemin framundan og að venju höfum við nóg að gera
En til að hafa smá fræðslu þá ætlar hann Gustav frá Securitas að koma og kynna fyrir okkur neyðarhnappinn og er það góð tímasetning þar sem við erum að fara í eldri borgara verkefnið okkar seinna í mánuðinum.
Talningin í Hagkaup gekk vel og var góð fjáröflun fyrir fræðslu og ferðasjóðinn okkar þar sem við vorum svo margar og lengi og einnig hafði verið hækkað við okkur kaupið svo við getum glaðst yfir því að eiga nóg í sjóði fyrir þau námskeið sem við viljum hafa fyrir okkur til að efla okkur sjálfar og hjálpa okkur við að vinna enn betur að þeim slysa og forvörnum sem Kvennasveitin Dagbjörg er að vinna að. Stjórn vil bara minna á að þær sem ekki taka þátt í verkefnum sveitarinnar, hvort sem það er fjáröflun eða önnur verkefni fá ekki niðurgreitt þegar farið er í skipulagðar ferðir á vegum sveitarinnar.
29.02.2012 15:13
Að undanförnu hefur Kvennasveitin fengið góð viðbrögð og margar góðar og skemmtilegar kveðjur vegna starfa sinna og verkefna undanfarið og getum við verið hæst ánægðar með okkur :)
Margrét Blöndal frá heimahjúkrun HSS hringdi í formanninn okkar og lýsti ánægju sinni á að við værum að fara af stað með eldriborgaraverkefnið okkar í næsta mánuði því það væri mikil og góð viðbót við starf heimahjúkrunar, einnig ræddi hún um að fingravinaverkefnið okkar með Ungbarnaeftirlitinu væri að koma mjög vel út og starfsmenn þess hjá HSS mætu það mikils og viðbrögð foreldra væru mjög góð, fellur þetta í góðann jarðveg og nýtist vel á heimilum fjölskyldna með börn.
Einnig hafa félagsmenn fengið góð og hvetjandi viðbrögð eftir þáttinn með Sirrý þar sem 4 félagsmenn fóru í viðtal til að kynna sveitina og starf hennar og verkefni. Svo við ættum að vera stoltar af starfi okkar og ekki hika við að segja frá því til að gefa fólki tækifæri á að kynnast því og til að fjölga félagsmönnum :)
Allt er á fullu í undirbúningi fyrir Kvennaþingið í haust og var hittingur í síðustu viku hjá Undirbúningshóp á hótelinu uppá Ásbrú, að sjálfsögðu fórum við í skoðunarferð um hótelið og leist öllum mjög vel á og fór nettur fiðringur um félagsmenn þegar þeir skoðuðu aðstöðuna sem er bara glæsileg.
Næsti félagsfundur er svo Mánudagskvöldið 5 Mars kl. 20:00 í húsi BS en aðalefni hans verður Aðalafundurinn sem er framundann en hann verður haldinn Föstudaginn 16 Mars kl. 20:00. Síðan ætlum við að skella okkur í eldriborgaraverkefnið Laugardaginn 17 Mars.
Laugardaginn 24 Mars býður síðan Slysavarnafélagið Landsbjörg öllum félögum slysavarnadeilda, kvennasveita og björgunarsveita á svæði 1 og 2 til Landshlutafundar í Reykjavík. Þetta er nýtt á vetvangi SL, þeir hafa verið með fundi á tveimur öðrum svæðum á þessu ári og gaf það góða raun og félagsmenn voru mjög ánægðir með að fá tækifæri til að ræða við stjórnarmenn SL og koma sínum hugmyndum og tillögum á framfæri, ekki síður en að hitta þessa einstaklinga í návígi sem stjórna því hvernig stóra regnhlífin okkar vinnur og virkar. Nánari upplýsingar um þetta kemur fljótlega :)
