24.01.2012 11:52
Fundur verður haldinn hjá Undirbúningshópnum Miðvikudaginn 25 Janúar kl.17:00 í húsi BS :)
Dagskrárefni er Kvennaþing, næsti félagsfundur sem er skemmtifundur og svo árshátíð Kvennasveitarinnar Dagbjargar og Björgunarsveitarinnar Suðurnes.
Þar sem tillaga kom á síðasta fundi að næsti félagsfundur hjá okkur yrði haldinn annarstaðar var farið af stað og málin könnuð. Og nú höfum við fengið boð um að koma á seinni hlutann á Aðalfundi Slysavarnadeildarinnar Hraunprýðis í Hafnarfirði :) hann verður haldinn Föstudaginn 3 Febrúar og er mæting fyrir okkur kl 20:00. Við munum hittast í húsi BS, safna í bíla og fara svo saman inneftir.
Við hvetjum félagsmenn til koma með því að eitt af því sem þarf að gera til fjölga í sveitinni er að efla félagsandann og hvetja til meiri sameiginlegrar starfsemi. Þær sem vilja koma með eru hvattar til að skrá sig hjá Kristbjörgu í síma 8402512.
Koma svo allir dugnaðarforkar í Kvennasveitinni Dagbjörgu
22.01.2012 11:40
Kynningarfundur Kvennaveitarinnar Dagbjargar s.l. þriðjudag gekk ljómandi vel og var gaman að hlusta á þær tvær Kristbjörgu og Þórunni sem kynntu gestum hvernig það er að vera í hinum mismunandi félögum sem eru innann Slysavarnafélagsins Landsbjargar, hve þau eru fjölbreytt störfin og verkefnin sem unnin eru þar, hvað fræðslan sem þú öðlast gefur þér og félagarnir sem þú eignast eru mikilvægir. Tvær konur gengu í sveitina og ein ákvað að skoða betur hvað nýliðaþjálfun björgunarsveitarinnar býður uppá.
Næst á dagskrá er svo næsti félagsfundur en hann verður Mánudaginn 6 Febrúar, verið er að kanna með að fara í heimsókn til annarrar slysavarnadeildar en áskorun um það kom á kynningarfundinum.
Síðan á að vera námskeið Fimmtudaginn 9 Febrúar sem Dagbjört Kristinsdóttir ætlar að vera með fyrir okkur um hin ýmsu mál og hinar ýmsu hliðar á því sem við erum að fjalla um og vinna að þegar við erum að kynna öðrum hvað sé mikilvægt í slysavörnum á heimilum og í umhverfi okkar.
112 dagurinn er síðan 11 Febrúar en ekki hefur verið ákveðið með hvernig við tökum þátt í honum.
Fjáröflunin okkar fyrir fræðslusjóðinn er síðan í endann á Febrúar en þá förum við í talningu í Hagkaup.
Stjórn vill líka minna á að enn erum við að selja kertatilboðin sem við vorum með fyrir jól og gekk mjög vel og hvetjum við ykkur til að halda áfram að auglýsa og kynna þau. Einnig eigum við spilabækurnar og fingurbjargir fyrir þær sem vilja kynna og selja þær. Svo nú er bara að taka þessa daga frá og mæta galvaskar á næstu fundi og atburði
13.01.2012 21:22
Þriðjudagskvöldið 17 Janúar býður Kvennasveitin Dagbjörg öllum sem áhuga hafa á að koma á opið hús að Holtsgötu 51, hús Björgunarsveitarinnar Suðurnes. Þar verður hægt að koma og spjalla og spyrjast fyrir um starf og verkefni sveitarinnar.
Kristbjörg Gunnbjörnsdóttir mun verða með kynningu á starfsemi og vekefnum sveitarinnar, hvað við gerum til fjáröflunar, hvernig við störfum með Björgunarsveitnni Suðurnes og Unglingadeildinni Klett, hvernig við vinnum að slysavörnum í bæjarfélaginu og hvað við gerum til að efla félagsandann.
Þórunn Kristjánsdóttir sem er bún að fara í gegnum unglingadeildina og nýliðadeildina og er nú fullgildur meðlimur í Björgunarsveitinni Suðurnes og varamaður í stjórn mun segja frá hvernig það er að að starfa í þessum sveitum, hvað þarf að leggja á sig, hvaða þjálfun þarf að ná, hvaða tími fer í þetta og ekki síst hvað þetta gefur einstaklingnum.
Að sjálfsögðu eru svo ljúffengar veitingar til að gæða sér á með ilmandi kaffisopa til að væta kverkarnar svo allir geti spurt og spjallað um allt sem hugurinn leitar eftir og veltir fyrir sér um starfsemi slysavarnafélaga undir merkjum Slysavarnafélagsins Landsbjargar.
11.01.2012 20:50
Um allt land vinna slysavarnadeildir mikilvægt starf á sviði slysavarna og sem bakhjarlar björgunarsveita svo eitthvað sé nefnt.
Þann 17 Janúar opna slysavarnadeildir um allt land dyr sínar þeim sem áhuga hafa á því að ganga til liðs við þær og kynna starf sitt með einum eða öðrum hætti. Athugið að tímasetning gæti verið önnur í þínu sveitarfélagi svo kannaðu málið til að vera viss.
Gakkti til liðs við skemmtilegan félagsskap og um leið leggur þú góðum málefnum lið.
Kvennasveitin Dagbjörg er þáttakandi í þessu kynningarátaki og býður öllum þeim sem vilja kynna sér starfsemina að koma í hús Bjögunarsveitarinnar Suðurnes Holtsgötu 51 í Reykjanesbæ kl 20:00 Þriðjudaginn 17 Janúar. Nánari dagskrá síðar.
07.01.2012 13:59
Þá er komið að fyrsta félagsfundi á nýju ári og verður hann haldinn í húsi BS Mánudaginn 9 Janúar kl. 20:00
Á dagskrá verður kynning á þeim verkefnum sem eru framundan hjá okkur en að venju er margt að gerast og alltaf hægt að finna sér fjölbreytt verkefni að vinna og styðja við ef þú ert í Kvennasveitinni Dagbjörgu :)
Helstu verkefnin sem eru á döfinni eru Kynningarfundur Slysavarnafélagsins Landsbjargar á öllum slysa og kvennasveitum undir þeirra merkjum en hann verður Þriðjudaginn 17 Janúar.
Eins er mjög skemmtileg verkefni framundan á slysavarnasviði, bæði í sambandi við börnin í bænum okkar og hjá eldri borgurum, eða heldri borgurum bæjarinns eins og þau eru líka kölluð ;)
Einnig er verið að undirbúa námskeið fyrir okkur, skemmtifundur er á döfinni og svo styttist í Aðalfund og ef þú hefur áhuga á að vera með í stjórn þessa félags endilega láttu vita af því
02.01.2012 10:29
Stjórn Kvennasveitarinnar Dagbjargar þakkar öllum félagsmönnum fyrir ánægjulegt samstarf á liðnu ári með ósk og von um gleðilegt nýtt ár og áframhaldandi gott og uppbyggjandi samstarf á árinu 2012.
Samstarfið við Björgunarsveit Suðurnesja meðan á flugeldasölunni stóð gekk vel þó að við hefðum viljað sjá fleiri taka þátt þannig að þær sem mættu hefðu getað verið í styttri tíma. Svo er að minna á að næsti félagsfundur verður Mánudaginn 9 Janúar n.k. kl. 20:00 og verður gaman að hitta ykkur allar á þessu nýbyrjaða ári sem að ber svo margt spennandi í skauti sínu í starfinu hjá okkur eins og kynningardag allra slysavarnadeilda Slysavarnafélagsins Landsbjargar á landinu sem verður 17 Janúar, óvissuferð 5 maí og svo Kvennaþingið í September fyrir utan fundina okkar, námskeið og annað félagsstarf
29.12.2011 20:51
Nú bráðvantar fleiri félagsmenn til að koma til að aðstoða niðrí björgunarsveitarhúsi, bæði við flugeldasöluna og einnig að aðstoða við matinn. Allir félagsmenn eru hvattir til að hringja í Kvennasveitarsímann 8402512 og skrá sig. Það eru bara tveir dagar eftir en það eru líka dagarnir sem mest er um að vera og mesta mannaflsþörfin. Svo koma svo Kvennasveitarkonur, leggið ykkar lóð á vogaskálarnar, Þó að þið getið ekki verið nema 2-3 tíma er það strax mikil hjálp og sýnir stuðning ykkar við félagið ykkar.
29.12.2011 01:38
Allar kraftmiklar kvennasveitarkonur eru hvattar til að hringja og skrá sig í síma Kvennasveitarinnar 8402512 og bjóða sig fram til að aðstoða við verkefnin í flugeldasölunni. Hver stund er vel þegin og allur stuðningur vel metin. Nú heyrum við allstaðar þessa setningu " Hvað gerir þinn flugeldasali fyrir þig" og við spyrjum "hvað vilt þú gera fyrir þína björgunarsveit" svo taka upp tólið hringja í síma 8402512 og vertu með !!!
27.12.2011 19:32
Þá eru jóladagarnir byrjaðir og vonar stjórn Kvennasveitarinnar að félagsmenn hafi átt góða daga í faðmi fjölskyldunnar og glaðst við mat, drykk, gjafir og fjölskylduknús :)
En nú er stærsta fjáröflun Björgunarsveitarinnar Suðurnes að byrja og að venju leggja félagar í Kvennasveitinni Dagbjörgu sín lóð á vogarskálarnar til að aðstoða þá í þessu verkefni. Allar þær sem geta lagt eitthvað af tíma sínum af mörkum næstu daga eru hvattar til að skrá sig í síma Kvennasveitarinnar 8402512. Helstu verkefni eru að sjá um hádegismat, en sem betur fer hafa björgunarsveitarmenn mjög einfaldann smekk og vilja bara grjónagraut í hádeginu með kaldri lifrapylsu að þjóðlegum sið :) Síðan er boðið uppá aðeins fjölbreyttara á kvöldin en samt þannig að auðvelt er að sjá um það. Þannig að allar handlagnar húsmæður geta lagt sitt af mörkum og eins og áður þá munar um hverja stund. Þið sýnið einnig með þáttöku í þessu verkefni að þið eruð hluti af þessum stóra hóp sjálfboðaliða sem er í hinu merka og sterka félagi Slysavarnafélagið Landsbjörg sem státar af stærsta
sjálfboðaliðahóp landsins og er einnig það félag sem er með mestu velvild landsmanna.
Koma svo allar kraftmiklar konur í Kvennasveitinni Dagbjörgu, styðjið við þetta stóra verkefni sveitarinnar og skráið ykkur sem fyrst.
14.12.2011 22:23
Þá er komið að flugeldasölunni sem fer fram daganna 27 - 31 Desember. Þann tíma höfum við aðstoðað Björgunarsveitina Suðurnes með því að elda og útbúa margvíslegar kræsingar að okkar hætti fyrir þá sem eru að gefa tíma sinn og orku í að vinna, bæði við að undirbúa söluna, við að undirbúa flugeldasýningu, vinna á lagernum, þá sem eru að selja flugeldanna og alla aðra sem aðstoða við að gera þetta fjáröflunarverkefni Björgunarsveitarinnar sem best úr garði. Eins höfum við boðið uppá heitt kakó og piparkökur þegar flugeldasýningunni er lokið en hún fer alltaf fram 28 Desember.
Svo nú er komið að ykkur félagskonur góðar. Þær sem vilja og geta tekið að sér að vera með yfirumsjón í eldhúsinu eða aðstoðað á annann máta eru hvattar til að hafa samband við Kristbjörgu og ræða málin
Þetta er eitt af þeim verkefnum sem tengir þessar tvær sveitir mest saman, þar leggja allir sem geta hönd á plóg og vinna saman, og ekkert er skemmtilegra en þegar allt er á fullu frammi í flugeldasölunni, biðröð eftir að fá afgreiðslu, allt á fullu við að fylla á lagerinn, verið er að sendast eftir tertum og flaugum út á lager, unglingarnir bera poka og kassa útí bíl til ánægðra viðskiftavina, eftirlitið að kíkja á málin, Kári út um allt að snúast og svo er komið inní eldhús og grjónagrautnum gerð góð skil og kaffisopinn vel þeginn og allir brosa og kinka kolli og knúsast og þakka fyrir enn eina ánægjulega flugeldasöluna :) Allar félagskonur sem vilja vera með í þessum skemmtilegu dögum eru hvattar til að skrá sig hjá Kristbjörgu, það þarf ekki að vera í marga klukkutíma en hver stund er dýrmæt og vel þegin, Þannig að allar sem geta aðstoðað við undirbúning, matseld, frágang, kakógerð eða flugeldasölu takið upp símann og hringið, skráið ykkur og njótið þess að vera sjálfboðaliðar. Síminn hjá Kristbjörgu er 8402512
05.12.2011 08:37
Það er góður hópur Kvennasveitarkvenna sem ætlar að koma saman í kvöld 5 Des. að útbúa syndsamlega gott og ljúffengt konfekt sem er bæði freistar bragðlauka og er heillandi fyrir augað :)
Allar að muna eftir að koma með 1500kr. ofnplötur, svuntur, einhverjar ætla að koma með kökukefli og svo ekki síst box eða kassa fyrir konfektið nema þú ætlir að freistast til að klára það í kvöld :)
Einnig vonast stjórn til að félagar komi með smakk af jólasmákökunum sem þeir hafa verið að baka fyrir jólin og gefi okkur tækifæri á að finna ljúffengt bragðið og svo verður boðið uppá kaffi og jólaöl með því. Líka hefur heyrst að eitthvað óvænt verði í boði en það kemur í ljós í kvöld :)
Minni einnig á Undirbúningsfundinn í dag kl. 16:00 með Dagbjörtu og Helgu í Kaffitár og svo er Jólamaturinn með Björgunarsveitinni Suðurnes annaðkvöld 6 Des. kl 19:00. Ilmandi hangikjöt og annað sem tilheyrir ásamt ljúffengum eftirrétt og alls þessa notið í hópi þeirra sem vilja frekar gefa en þiggja.
02.12.2011 12:24
Athugið !!! Fundurinn hjá Undirbúningshóp er í Kaffitár en ekki í húsi björgunarsveitarinnar.
Mánudaginn 5 Desember kl 16:00.
01.12.2011 20:22
Nú styttist í Jólafundinn okkar og svo í jólamatinn með Björgunarsveitinni Suðurnes og hvetjum við ykkur til að skrá ykkur sem allra fyrst svo hægt sé að versla inn eins og þarf, bæði fyrir föndrið og fyrir matinn, því ekki viljum við að einhver fari í "jólaköttinn" ef ekki er nógu mikið af öllu :)
Jólafundurinn kl 20:00 5 Des. og Jólamaturinn kl 19:00 6 Des. og enn eitt.....það kostar bara 500kr. fyrir matinn :) 
Hægt er að hringja eða senda sms og skrá hjá Kristbjörgu í síma 8402512 og hjá Ragnheiði í síma 8475286, einnig í hópnum félagskonur á feisbook.
Svo er það næsti fundur hjá Undirbúningshóp en hann verður Mánudaginn 5 Des kl 16:00 og eru allar þær sem eru í þeim hóp beðnar um að mæta niður í Björgunarsveitarhús þar sem Dagbjört og Helga starfsmenn Slysavarnafélagsins Landsbjargar ætla að koma og ræða við okkur um hvernig skipulagið og undirbúningurinn gengur fyrir Kvennaþingið næsta haust.
Svo er bara að mæta jólalegar með jólaskapið á báða þessa atburði hjá okkur og njóta þess að vera í góðum hóp félaga.
29.11.2011 19:27
Nú er Jólafundurinn okkar að nálgast en hann verður í húsi BS Mánudagskvöldið 5 Desember kl. 20:00
Undirbúningshópurinn hefur ákveðið að bjóða okkur uppá að búa til ljúffengt konfekt sem á eftir að renna ljúflega niður um hátíðirnar. Þær sem ætla að taka þátt þurfa að skrá sig hjá Ragnheiði í síma 847-5286 eða hjá félagskonum á feisbook. Síðasti dagur til að skrá sig er 1 Desember. Þetta mun kosta 1500kr. á mann en ekki þarf að borga fyrr en á jólafundinum. Einnig þurfa konur að hafa með sér 2 ofnplötur, svuntur, og box eða eitthvað ílát undir konfektið. Engin formleg dagskrá er á fundinum, við ætlum bara að njóta þess að vera saman við að föndra, þær sem eru búnar að baka jólasmákökur eru hvattar til að koma með smá með sér og bjóða félagskonum að smakka og svo verður boðið uppá jólaöl og jólatónlist.
Svo er hinn árlegi Jólamatur með Björgunarsveitinni Suðurnes Þriðjudaginn 6 Desember. kl 19:00 Að venju verður boðið uppá hið sígilda og ljúffenga hangikjöt ásamt öðru því sem tilheyrir eins og uppstúf, rauðkáli og grænum baunum. Að sjálfsögðu verður einnig boðið uppá dýrðlegan eftirrétt sem engann svíkur.
Í ár er það Björgunarsveitin Suðurnes sem sér um jólamatinn svo við í Kvennasveitinni þurfum bara að skrá okkur og mæta svo hressar og svangar :) tilbúnar að hafa notalega stund með eldhressum Kvennasveitakonum og Björgunarsveitarfólki sem öll tilheyra því merka félagi Slysavarnafélagið Landsbjörg.
Skráning í Jólamatinn er hjá formanni okkar henni Kristbjörgu í síma 8402512, bæði hægt að hringja og senda sms, einnig er hægt að skrá sig á feisbook í félagskonum. Jólamaturinn mun kosta 1000kr. á mann.
Með ósk um að sja ykkur sem flestar á báðum þessum kvöldum í jóla og hátíðarskapi og endilega vera með eitthvað jóla í fatnaðinum hvort sem það er húfa eða eitthvað annað jólalegt :)
29.11.2011 01:49
Góðann daginn öll sömul :)
Bara að tékka hvort ekki sé allt í lagi
